Shayri ( My Collection) - Page 5

Posted: 11 years ago
Dil Dukhaanay Ki Intehaa Kar Di 
Aazmanay Ki Intehaa Kar Di 
Teer Tohfay Main Bhej Kar Usnay 
Zulm Dhanay Ki Inteha Kar Di 
Chonk Kar Naam Poochnay Walay 
Bhool Janay Ki Inteha Kar Di 
Jeet Ne Maat Orh Li Goya 
Sir Jhukanay Ki Inteha Kar Di 
Dil Ko Nasoor Kar Liya Aakhir 
Ghaav Khanay Ki Inteha Kar Di 
Phir Palat Kar Kabhi Nahi Dekha 
Usnay Janay Ki Inteha Kar Di 
Khud Ko Khonay Ka Bhi Pata Na Chala 
Usko Panay Ki Inteha Kar Di 
Ta-Falak Ho Gaya Dhuwaan Sa 
Raakh Uranay Ki Intehaa Kar Di...!!!
Posted: 11 years ago
Thi Gar Anay Main Maslihat Haail 
Yaad Aana Koi Zaroori Tha ? 
Dekhiye Ho Gayi Ghalat-Fehmi 
Muskuraana Koi Zaroori Tha ? 
Lijiye Baat Hi Na Yaad Rahi 
Gungunana Koi Zaroori Tha ? 
Gunguna Kar Meri Jawaan Ghazlein 
Jhoom Jana Koi Zaroori Tha ? 
Mujh Ko Paa Kar Kisi Khayaal Main Gum 
Chhup Ke Aana Koi Zaroori Tha ? 
Uff Wo Zulfein, Wo Nigahein, Wo Hansi 
Yun Daraana Koi Zaroori Tha ? 
Aur Aisay Eham Mazaaq Ke Baad 
Rooth Jaana Koi Zaroori Tha ?
Posted: 11 years ago
Mom Ki Tarha Pighaltay Hue Dekha Usko 
Rutt Jo Badli To Badaltay Hue Dekha Usko 
Janay Kis Gham Ko Chupanay Ki Tamanna Thi Usay 
Aj Har Bat Par Hanstay Hue Dekha Usko 
Wo Jo Kanto'n Ko Bhi Narmi Se Chua Karta Tha 
Hamnay Phoolo'n Ko Masaltay Hue Dekha Usko 
Na Janay Wo Duao'n Main Mangta Hai Kisay 
Hath Uthatay Hi Sisaktay Hue Dekha Usko 
Phir Hath Dua Ke Liye Uthaye Hamnay 
Jab Muqaddar Se Ulajhtay Hue Dekha Usko...!!!
Posted: 11 years ago
Wohi Aahatein Dar-O-Baam Par, Wohi Ratjagon Ke Azaab Hain 
Wohi Adh-Bujhi Meri Neend Hai, Wohi Adh-Jalay Meray Khwab Hain 
Kabhi Chaha Khud Ko Sametna To Bikhar Ke Aur Bhi Reh Gaya 
Hain Jo Kirchi Kirchi Paray Hue, Meray Samnay Meray Raaz Hain 
Ye Na Pooch Kaisay Basar Kiye, Shab-O-Roz Kitnay Pehar Jiye? 
Kisay Raat Din Ki Tameez Thi, Kisay Yaad Itnay Hisaab Hain?
Posted: 11 years ago
Tumharay Chand Se Chehray Pe Gham Acchay Nahi Lagtay 
Hamein Keh Do Chalay Jao Jo Hum Acchay Nahi Lagtay 
Hamein Wo Zakhm Do Sajan Jo Sari Umr Na Bhar Payein 
Jo Jaldi Bhar Ke Mit Jayein Wo Zakhm Acchay Nahi Lagtay 
Tumhay Har Ghazal Main Likhna Mera Dastoor Hai Lekin 
Sar-E-Mehfil Teray Charchay Mujhay Acchay Nahi Lagtay 
Main Chahat Ki Is Manzil Pe Aa Pahuncha Hoon 'Wasi' 
Tumharay Chahnay Walay Mujhay Acchay Nahi Lagtay...!!!

Posted: 11 years ago
Zulm Seh Kar Bhi Samjhta Hoon Ke Tu Mera Hai 
Meray Dushman Teray Chehray Pe Lahu Mera Hai 
Dubha Dam Shehr Ki Shorish Teray Dum Se Hogi 
Raat Ke Pichlay Pehar Aalam-E-Hoo Mera Hai 
Meray Hathon Main Chupay Zakhm Se Pehchan Mujhay 
Teray Daman Pe Bhi Ehsaan Rafu Mera Hai 
Ghir Gaya Hoon Main Talatum Main Bhi Zindan Ki Tarha 
Halqa-E-Mauj-E-Rawan Touq-E-Gulu Mera Hai 
Itni Shohrat Bhi Kahan Chahi Thi Khud Se Mainay 
Apnay Hi Shehr Ka Har Shakhs Adu Mera Hai 
Dhoop Chaanv Ki Ye Rutt Dil Main Thehr Janay De 
Aks Tera Hai To Saya Lab Jo Mera Hai 
Pattharon Se Mohabbat Mujhay Yun Bhi Hai 'Mohsin' 
Sangdil Shehr Main Ik Aaiina Ru Mera Hai...!!!
Posted: 11 years ago
Usay Mainay Hi Likkha Tha 
Ke Lehjay Barf Hojayein 
To Phir Pighla Nahi Kartay 
Parinday Dar Ke Urr Jayein 
To Phir Lauta Nahi Kartay 
Usay Mainay Hi Likkha Tha 
Yaqeen Uth Jaye To Shayad 
Kabhi Wapas Nahi Ata 
Hawao'n Ka Koi Toofan 
Kabhi Baarish Nahi Laata 
Usay Mainay Hi Likkha Tha 
Ke Sheehsa Toot Jaye To 
Kabhi Phir Jurr Nahi Pata 
Jo Rastay Se Bhatak Jaye 
Wo Wapas Murr Nahi Pata 
Usay Kehna Wo Be Mayni Adhoora Khat 
Usay Mainay Hi Likkha Tha 
Usay Kehna Ke Deewanay 
Mukammal Khat Nahi Likhtay...!!!
Posted: 11 years ago
Meri Zindagi Ke Wo Chand Saal Mujhay De Do 
Jawab Mat Do, Bas Meray Sawaal Mujhay De Do 
Chalo Mat Lautao Tum Mera Maazi Mujhay 
Par Chand Lamhon Ke Liye Mera Haal Mujhay De Do 
Tum Kyun Takrao Sar-E-Raah Meri Yad Main Kho Kar 
Sar Utha Kar Chalo, Ye Larkharaati Chal Mujhay De Do 
Shayad Kabhi Jaan Sako Apni Muskaan Ki Qeemat 
Mera Urooj Tumharay Naam, Apna Zawaal Mujhay De Do 
Tumharay Dukhon Ke Bina Be-Rooh Hai Mera Zauq-E-Sukhan 
Kam Se Kam Meri Wajh-E-Kamaal Mujhay De Do...!!!
Posted: 11 years ago
Kahan Mumkin Tha Main Dil Se Teri Yaadein Mita Deta 
Bhala Kaisay Main Jeeta Phir Agar Tujhko Bhula Deta 
Teri Ruswayi Ke Dar Se Labon Ko Si Liya Warna 
Teray Shehr-E-Munafiq Ki Main Bunyadein Hila Deta 
Kiya Tark-E-Wafa Usnay To Hogi Uski Majboori 
Jisay Barson Dua Di Thi Usay Kya Bad-Dua Deta 
Khabar Hoti Agar Mujhko Nahi Hai Tu Muqaddar Main 
Usi Lamhay Main Hathon Ki Lakeeron Ko Mita Deta...!!!
Posted: 11 years ago
Baat Ye Teray Siwa Bhala Kis Se Karein 
Tu Jo Jafa-Kaar Hai To Wafa Kis Se Karein 
Aaiina Samnay Rakkhein To Nazar Aye Tu 
Tujhsay Jo Baat Chupani Ho, Kahan Kis Se Karein 
Haath Uljhay Hue Resham Main Phansa Bethay Hain 
Ab Bata Konsay Dhagay Ko Juda Kis Se Karein 
Zulf Se, Chashm-O-Lab-O-Rukh Se, Ke Teray Gham Se 
Bat Ye Hai Ke Dil-O-Jan Se Reha Kis Se Karein 
Tu Nahi Hai To Aey Husn Saaz Bata 
Is Bharay Shehr Main Hum Jaisay, Mila Kis Se Karein 
Toonay Apni Si To Karni Thi So Kar Li 'Khawar' 
Mas'ala Ye Hai Ke Hum Is Ka Gila Kis Se Karein...!!!

Related Topics

doc-text Topics pencil Author stackexchange Replies eye Views clock Last Post Reply
Sad Shayari Collection in Hindi सैड शायरी - Shayari Skill

pencil Nishant0123   stackexchange 0   eye 327

Nishant0123 0 327 5 months ago Nishant0123

Topic Info

13 Participants 939 Replies 56052Views

Topic started by .Hussain.

Last replied by Nehageet.

loader
loader
up-open TOP