Shayri ( My Collection) - Page 7

First Previous

page

Next Last

Hussain

@.Hussain.

IF-Stunnerz

Posted: 11 years ago

Kaash Aa Jaye, Mujhay Jan Se Guzartay Dekhay
Us Ki Khwahish Thi Kabhi Mujhko Bikhartay Dekhay
Wo Saleeqay Se Hua Humsay Gurezaan Warna
Log To Saaf Mohabbat Se Mukartay Dekhay
Tumnay Dekha Hai Nikalta Hua Sooraj Logo
Tumnay Kuch Khwab Suhanay Nahi Martay Dekhay
Ek Sehmay Hue Saahil Ki Tarha Ankho'n Ne
Kitnay Charhtay Hue Toofan Utartay Dekhay
Waqt Hota Hai Har Ek Zakhm Ka Marham 'Mohsin'
Phir Bhi Kuch Zakhm Thay Aisay Jo Na Bhartay Dekhay...!!! Edited by AttitudePrince - 11 years ago

Quote

Frequent Posters

Hussain

@.Hussain.

IF-Stunnerz

Posted: 11 years ago

Saray Waado'n Ko Bhula Sakta Hoon Magar Rehnay Do
Main Tumhay Chor Ke Ja Sakta Hoon Magar Rehnay Do
Tum Jo Har Mor Par Keh Detay Ho Khuda Hafiz
Faisla Main Bhi Suna Sakta Hoon Magar Rehnay Do
Tumnay Jo Baat Kahi Dil Ko Dukhanay Wali
Mai Us Par Muskura Sakta Hoon Magar Rehnay Do
Sharam Ayegi Tumhay Warna Tumharay Waday
Main Tumhay Yaad Dila Sakta Hoon Magar Rehnay Do...!!!

Quote

Hussain

@.Hussain.

IF-Stunnerz

Posted: 11 years ago

Koi Nayi Chot Phir Se Khao, Udaas Logo
Kaha Tha Kisnay Ke Muskurao, Udaas Logo
Guzar Raheen Hain Gali Se Phir Matami Hawayein
Kiwaar Kholo, Diye Bujhao, Udaas Logo
Jo Raat Maqtal Main Baal Kholay Utar Rahi Thi
Wo Raat Kaisi Rahi? Sunao, Udaas Logo
Kahan Talak Baam-O-Dar Chiraghan Kiye Rakhogay
Bicharnay Walo Ko Bhool Jao, Udaas Logo
Ujaar Jungle, Dari Fiza, Haanpti Hawayein
Yaheen Kaheen Bastiyan Basao, Udaas Logo
Ye Kisnay Sehmi Hui Fiza Main Hamay Pukara
Aur Ye Kisnay Awaaz Di Ke, Aao, Udaas Logo
Ye Jan Ganwanay Ki Rutt Yunhi Rayengan Na Jaye
Sar-E-Sina Koi Sar Sajao, Udaas Logo
Usi Ki Baato'n Se Tabiyat Sambhal Sakegi
Kaheen Se 'Mohsin' Ko Dhoond Lao, Udaas Logo...!!!

Quote

Hussain

@.Hussain.

IF-Stunnerz

Posted: 11 years ago

Haalat Ke Qadmo'n Pe Qalandar Nahi Girta
Tootay Bhi Jo Taara To Zameen Par Nahi Girta
Samjho Wahan Phaldaar Shajar Koi Nahi Hai
Wo Sehan Ke Jis Main Koi Patthar Nahi Girtaa
Itna To Hua Fayeda Baarish Ki Kami Se
Is Shehr Main Ab Koi Phisal Kar Nahi Girta
Inaam Ke Laalach Main Likhay Madh'a Kisi Ki
Itna To Kabhi Koi Sukhanwar Nahi Girta
Us Banda-E-Khud'daar Pe Nabiyo'n Ka Hai Saaya
Jo Bhook Main Bhi Luqma-E-Tar Par Nahi Girta
Karna Hai Jo Sar Marka-E-Zeest To Sun Le
Be-Baazo-E-Haider, Dar-E-Khaibar Nahi Girtaa
Qayam Hai "Qateel" Ab Ye Meray Sar Ke Sa'aton Par
Bhunchaal Bhi Aaye To Mera Ghar Nahi Girta...!!!

Quote

Hussain

@.Hussain.

IF-Stunnerz

Posted: 11 years ago

Chehray Pe Meray Zulf Ko Phailao Kisi Din

Kya Roz Garajtay Ho Baras Jao Kisi Din

Raazo'n Ki Tarha Utro Meray Dil Main Kisi Shab

Dastak Pe Meray Haath Ki Khul Jao Kisi Din

Pedo'n Ki Tarha Husn Ki Baarish Main Naha Loon

Baadal Ki Tarha Jhoom Ke Ghir Aao Kisi Din

Khushboo Ki Tarha Guzro Meray Dil Ki Gali Se

Phoolo'n Ki Tarha Mujh Pe Bikhar Jao Kisi Din

Phir Haath Ko Khairaat Milay Band-E-Qaba Ki

Phir Lutf-E-Shab-E-Vasl Ko Dohrao Kisi Din

Guzarein Jo Meray Ghar Se To Ruk Jayein Sitaray

Is Tarha Meri Raat Ko Chamkao Kisi Din

Main Apni Har Ik Saans Usi Raat Ko De Doon

Sar Rakh Ke Meray Seenay Pe, So Jao Kisi Din...!!!

Quote

Hussain

@.Hussain.

IF-Stunnerz

Posted: 11 years ago

Phir Is Duniya Se Ummeed-E-Wafa Hai
Tujhay Aey Zindagi Kya Ho Gaya Hai
Badi Zaalim Nihayat Bewafa Hai
Ye Duniya Phir Bhi Kitni Khush-Numa Hai
Har Ik Apnay Hi Gham Main Mubtila Hai
Kisi Ke Dard Se Kon Aashna Hai
Kahan Hoon Shad? Main To Shad Sa Hoon
Wo Shad-E-Khush-Nava To Mar Chuka Hai...!!!

Quote

Hussain

@.Hussain.

IF-Stunnerz

Posted: 11 years ago

Aa Ke Le Jaye Meri Ankho'n Ka Pani Mujhsay
Kyun Hasad Karti Hai Karti Hai Dariya Ki Rawani Mujhsay
Gosht Nakhun Ka Alag Kar Ke Dikhaya Mainay
Usnay Poochay Thay Judaayi Ke Ma'ani Mujhsay
Teri Khushboo Ki Lehed Par Main Tanha Tha
Ro Pari Mil Ke Gull-E-Raat Ki Raani Mujhsay
Khatam Honay Laga Jab Khoon Bhi Ashko'n Ki Tarha
Kar Gaye Khwab Meray Naqal Makani Mujhsay
Sirf Ek Shakhs Ke Gham Main Mujhay Barbaad Na Kar
Roz Rotay Hue Kehti Hai Jawani Mujhsay...!!!

Quote

Hussain

@.Hussain.

IF-Stunnerz

Posted: 11 years ago

Wahan Na To Phool Khiltay Hain Na Hi Mausam Badaltay Hain
Wahan To Kuch Nahi Hota Jahan Par Tum Nahi Hoti
Yahan Waisay To Har Sogha'at Aasaani Se Milti Hai
Mera Bas Dil Nahi Lagta Jahan Par Tum Nahi Hoti
Yahan To Log Sadiyo'on Ko Bhi Lamho'on Main Badaltay Hain
Mera Ek Pal Nahi Kat'ta Jahan Par Tum Nahi Hoti
Sabab Ronay Ka Wo Poochein To Bas Itna Keh Dena
Mujhay Hansna Nahi Aata Jahan Par Tum Nahi Hoti…!!!

Quote

Hussain

@.Hussain.

IF-Stunnerz

Posted: 11 years ago

Jin Raaho Pe Ek Umr Teray Saath Raha Hoon

Kuch Roz Se Wo Rastay Sunsaan Bahut Hain

Mil Jao Kabhi Laut Ke Phir Aao'on Na Shayad

Kamzor Hoon Main Raah Main Toofan Bahut Hain

Ik Tum Hi Nahi Meri Judayi Main Pareshan

Hum Bhi To Teri Chah Main Veeran Bahut Hain

Ik Tark-E-Talluq Pe Usay Main Kaisay Bhula Do'n

Mujh Par Abhi Us Shakhs Ke Ehsaan Bahut Hain

Bhar Jaayein Na Ankhein To Main Ek Baat Batao'n

Ab Tujhsay Bichar Janay Ke Imkaan Bahut Hain...!!!

Quote

Hussain

@.Hussain.

IF-Stunnerz

Posted: 11 years ago

Yahan Chahato'n Ka Sila Nahi
Yahan Dosti Ka Maza Nahi
Yahan Janay Kaisi Hawa Chali
Rahi Dosto'n Main Wafa Nahi
Yahan Jal Gaya Mera Aashiyaana
Abhi Badlo'n Ko Pata Nahi
Teray Dar Par Dastak De Sako'n
Ye Haq To Tumnay Diya Nahi
Main Raahi Hoon Raah-E-Ummed Ka
Mujhay Manzilo'n Ka Pata Nahi
Be-Bas Hoon Jahan Main Is Qadar
Jaisay Mera Koi Khuda Nahi
Meri Saadgi Mera Jurm Hai
Koi Aur Meri Khata Nahi...!!!

Quote

1 ... 5 6 7 8 9 ... 94

topics	author	replies	views	reply
Sad Shayari Collection in Hindi सैड शायरी - Shayari Skill Nishant0123 0 382	Nishant0123	0	382	6 months ago Nishant0123 >

Shayri ( My Collection) - Page 7

Related Topics