kal ek naaqid-e-Gaalib ne mujh se ye puuchhaa
ki qadr-e-Gaalib-e-marhuum kaa sabab kyaa hai
mujhe bataa.o ki diivaan-e-hazrat-e-Gaalib
kalaam-e-paak hai injiil hai ki giitaa hai
sunaa hai shahr-e-karaachii me.n ek saahab hai.n
kalaam un kaa bhii Gaalib se miltaa jultaa hai
hamaaraa dost tufailii bhii hai ba.Daa shaa.er
agarche ek ba.De aadmii kaa chamcha hai
to phir ye Gaalib-e-marhuum kii hii barsii kyuu.n
mujhe bataa.o ki un me.n KHusuusiyat kyaa hai
na zauq kaa hai kahii.n tazkira na momin kaa
na zikr-e-miir kahii.n hai na yaum-e-saudaa hai
ye 'faiz' o 'maahir' o 'josh' o 'firaaq' kuchh bhii kahe.n
mirii nazar me.n to 'Gaalib' se zauq uu.nchaa hai
mujhe to 'miir-taqii-miir' se hai ek lagaa.o
ki 'miir' kuchh bhii sahii shaa.erii to kartaa hai
ye ra.ng laa.ii hai Gaalib kii party-bandii
ki aaj saare jahaa.n me.n usii kaa charchaa hai
ye ruus vaale jo 'Gaalib' pe jaan dete hai.n
mire KHayaal me.n is me.n bhii ko.ii ghaplaa hai
kahaa.n ke aise ba.De artist the Gaalib
ye chand ahl-e-adab kaa propaganda hai
anaa ne maar diyaa varna shaa.er achchhaa thaa
natiija ye ki jo honaa thaa us kaa aadhaa hai
likhii hai ek Gazal kii radiif ''hone tak''
ko.ii bataa.e ki kyaa ye bhii sahv-e-imlaa hai
kabhii hai mahv hasiino.n se dhaul-dhappaa me.n
kabhii kisii kaa vo sote me.n bosa letaa hai
jo kah rahe hai.n ki Gaalib hai falsafii shaa.er
mujhe bataa.e.n ki bose me.n falsafa kyaa hai
jahaa.n raqam kii tavaqqo hu.ii qasiida kahaa
tumhii.n kaho ki ye me.aar-e-shaa.erii kyaa hai
sharaab jaam me.n hai aur jaam haatho.n me.n
magar ye rind-e-balaa-nosh phir bhii pyaasaa hai
jo shaa.erii ho tajammul-hasiin-KHaa.n ke liye
vo ik tarah kii KHushaamad hai shaa.erii kyaa hai
KHitaab o KHil.at o darbaar ke liye us ne
na jaane kitne amiiro.n pe jaal Daalaa hai
sunaa ye hai ki vo suufii bhii thaa valii bhii thaa
ab is ke ba.ad to paiGambarii kaa darja hai
kahaa jo mai.n ne ki pa.Dhiye to pahle Gaalib ko
to bole KHaak pa.Dhuu.n mudda.aa to anqaa hai
mujhe KHabar hai ki 'Gaalib' kii zindagii kyaa thii
ki mai.n ne hazrat-e-Gaalib kaa film dekhaa hai
sunii jo mai.n ne ye tanqiid to samajh na sakaa
ki is Gariib ko 'Gaalib' se dushmanii kyaa hai
samajh gayaa ki ye bakvaas be-sabab to nahii.n
dimaaG kaa ko.ii purza zaruur Dhiilaa hai
ba.Dhii jo baat to phir mai.n ne us ko samjhaayaa
adab me.n hazrat-e-Gaalib kaa martaba kyaa hai
bataayaa us ko ki vo zindagii kaa hai shaa.er
bahut qariib se duniyaa ko us ne dekhaa hai
ajab tazaad kii haamil hai us kii shaKHsiyyat
ajiib shaKHs hai barbaad ho ke ha.nstaa hai
charaaG-e-sub.h kii maanind zindagii us kii
ik aasraa hai ik armaa.n hai ik tamannaa hai
jo us ko roknaa chaaho to aur tez bahe
ajiib mauj-e-ravaa.n hai ajiib dariyaa hai
chipak rahaa hai badan par lahuu se pairaahan
rafuu kii us ko zaruurat hai aur na parvaa hai
vo likh rahaa hai hikaayaat-e-KHuu.n-chakaan-e-junuun
jabhii to us ke qalam se lahuu Tapaktaa hai
bas ek lafz ke parde me.n daastaa.n kahnaa
ye fikr-o-fan kii bulandii usii kaa hissa hai
na kyuu.n ho.n aaj vo mash.huur puurii duniyaa me.n
ki us kii fikr kaa mauzuu.a puurii duniyaa hai
pahu.nch gayaa hai vo us manzil-e-tafakkur par
jahaa.n dimaaG bhii dil kii tarah dha.Daktaa hai
kabhii to us kaa ko.ii sher-e-saada-o-ra.ngii.n
ruKH-e-bashar kii tarah kaifiyat badaltaa hai
ye ham ne maanaa ki kuchh KHaamiyaa.n bhii thii.n us me.n
vo KHaamiyaa.n nahii.n rakhtaa ye kis kaa da.avaa hai
vo aadmii thaa KHataa aadmii kii hai fitrat
ye kyuu.n kahe.n ki vo insaa.n nahii.n farishta hai
jo chaahte hai.n ki fauq-ul-bashar banaa de.n use
hame.n to us ke un ahbaab se bhii shikva hai
hazaar logo.n ne chaahaa ki us ke saath chale.n
magar vo pahle bhii tanhaa thaa ab bhii tanhaa hai
kabhii valii kabhii vaa.iz kabhii KHaraabaatii
samajh sako to samajh lo vo ik mo.ammaa hai
agar ye sach hai ki alfaaz ruuh rakhte hai.n
to ye bhii sach hai vo alfaaz kaa masiihaa hai